पालिका टाइम्स ४ फाल्गुन २०७८, बुधबार प्रकाशित ४ फागुन, काठमाडौं । सिंहदरवारमा संसदीय दलको बैठक सकेर नेकपा माओवादी केन्द्रका अध्यक्ष पुष्पकमल दाहाल प्रचण्ड प्रधानमन्त्री निवास बालुवाटार पुगेका छन् ।
सत्ता गठबन्धनको सहमति बिना एमसीसी टेबल गर्न नहुने निर्णय गरेर प्रचण्ड प्रधानमन्त्री शेरबहादुर देउवालाई भेट्न बालुवाटार पुगेका हुन् ।
प्रधानमन्त्रीलाई एमसीसी अघि नबढाउन सुझाव दिनका लागि प्रचण्ड बालुवाटार पुगेको स्रोतको दावी छ । बालुवाटार स्रोतले भन्यो, ‘प्रचण्ड भर्खर आइपुग्नुभएको छ ।’
प्रधानमन्त्री शेरबहादुर देउवाले सत्ता गठबन्धनमा सहमति नगरी जवर्जस्ती संसदमा एमसीसी टेबल गरे सरकार छाड्ने माओवादी केन्द्रले निष्कर्ष निकालेको छ ।
सत्ता गठबन्धनमा सहमति नभएको विषयलाई जवर्जस्ती टेबल गरे सरकारमा रहनुको औचित्य समाप्त हुने भन्दै माओवादीले सरकार छाड्ने निष्कर्ष निकालेको हो ।
सिंहदरवारमा बसेको संसदीय दलको बैठकपछि सञ्चारकर्मीहरुसँग कुराकानी गर्दै नेता देव गुरुङले जवर्जस्ती एमसीसी अघि बढाए माओवादीले सरकार छाड्ने निष्कर्ष निकालेको जानकारी दिए ।
‘यो पाँच दलीय गठबन्धनको सरकार हो। गठबन्धनको सहमतिबिना कांग्रेसले टेबल गरे गठबन्धन भत्किन्छ,’ गुरूङले भने,‘गठबन्धन भत्किएपछि हामी सरकारमा बस्दैनौं।’
आज दिउँसो १ बजे संसद बैठक बस्दैछ । बैठकमा प्रधानमन्त्री देउवा एमसीसी टेबल गर्ने पक्षमा छन् । सत्ता गठबन्धनमा एमसीसी टेबल गर्ने विषयमा सहमति जुटेको छैन ।
पालिका टाइम्स | २३ साउन २०७७, शुक्रबार 
