कसरि एकाएक हिट भयो ‘रिङ्केबुङको राँगो’ ?

रिङ्केबुङको राँगोलाई, चुङ्केबुङको चुलेसीले
ताप्लेजुङमा ताकेर, कालेबुङमा काटेर
अरुण तम्मर तरौला, तिते फापर छरौंला
फुल लाउँला केसरी, खाउँला बेसरी ।

गायक सुरेश गन्धर्वले पञ्चायतकालमा गाएको यो कालजयी लोकभाका अहिले एकाएक शहरका युवायुवतीको जिब्रोमा झुण्डिन पुगेको छ । दुई पूर्वेली युवा दीपक आचार्य र रमेश प्रसाईले ‘पुनर्निर्माण’ गरेर दर्शक–स्रोतामाझ पेश गरेपछि यो गीतले करिब साढे चार दशकपछि पुनर्जीवन पाएको हो ।

गत ७ नोभेम्बरमा यूट्यूवमा अपलोड भएको गीत अहिलेसम्म साढे ११ लाखपटक हेरिएको छ । तीन हजारभन्दा बढी कमेन्ट आएका छन् । अधिकांश प्रतिक्रिया सुखद छन् । धेरै नेपालीहरुका प्रियपात्र बनेका रमेश प्रसाईले गाएको हुँदा यो गीत चर्चामा आउने विश्वास दीपकलाई थियो । अहिले आफूले सोचेभन्दा पनि राम्रो प्रतिक्रिया पाइरहेको उनी बताउँछन् ।

‘गीतले सुरुमै ह्वारह्वारी भ्यूज पाएको होइन, स्लो स्टार्ट गरेर बिस्तारै गति समातेको छ,’ उनले भने, ‘पक्कै पनि रमेशजीले गाएको भएर पनि गीतले पिकअप लियो ।’
रमेश भने आफ्नो कारणले नभई गीतको पुरानो बिरासतकै कारण सफल भएको बताउँछन् ।

‘गीतको शब्द र संगीत नै सबैभन्दा महत्वपूर्ण हुन्छ, मेरो नामले अलिकति चासो बढ्यो होला तर लोकप्रिय हुनुको प्रमुख कारण म होइन,’ उनले भने ।

अहिले युवायुवतीबीच सर्वाधिक लोकप्रिय एप टिकटकमा भाइरल भएपछि गीतले वास्तविक माइलेज पाएएको छ । टिकटकमा यो गीतका अनगिन्ती भिडियोहरु बनाइएका छन् । ती भिडियोहरुले लाखौं लाइक पाएका छन् । एउटा टिकटक भिडियोले अढाई लाखसम्म लाइक पाएको छ । टिकटकमा भाइरल भएपछि त्यसको प्रत्येक्ष प्रभाव यूट्यूवमा पर्छ ।

गीतको खर्च कटाएर हुने मुनाफा सबै गायक गन्धर्वलाई प्रदान गरिने दीपकले बताए । गीतको निर्माणमा अमेरिकाबाट वर्षा ज्वेलर्स र भानु फुयाँलले सहयोग गरेका छन् ।

भिडियो :