पालिका टाइम्स २२ जेठ २०७८, शनिबार प्रकाशित २२ जेठ, काठमाडौँ। नेकपा एमालेका नेताहरुले हिजो मात्र उपप्रधानमन्त्री नियुक्त भएका जसपाका नेता राजेन्द्र महतोको अभिव्यक्तिको विरोध गरेका छन् । शनिबार एमालेका बरिष्ठ नेता माधव कुमार नेपालसहित १५ नेताले संयुक्त वक्तव्य जारी गर्दै मन्त्री महतोको विरोध गरेका हुन् ।
‘विगतमा टुंगो लागिसकेको तथा संविधानसभा र नेपाली जनताबाट अस्वीकृत नेपाललाई बहुराष्ट्रिय राज्य बनाउने भन्ने कुरालाई पुनः दोहोर्याई यसका लागि कथित मुक्ति संग्रामको कुरा गरी राष्ट्रिय हित र अखण्डता विरोधी अभिव्यक्ति दिनु निन्दनीय छ’, नेपालसहितका नेताको संयुक्त वक्तव्यमा भनिएको छ ।
यस्तो अभिव्यक्ति संविधानको धारा ३ मा उल्लेखित बहुजातीय, बहुभाषिक, बहुधार्मिक, बहुसांस्कृतिक विशेषतायुक्त, भौगोलिक विविधितामा रहेका समान आकांक्षा र नेपाल राष्ट्रिय स्वतन्त्रता, भौगोलिक अखण्डता, राष्ट्रिय हित तथा समृद्धिप्रति आस्थावान रही एकताको सूत्रमा आवद्ध सबै नेपाली जनता समष्टिमा राष्ट्र हो’ भन्ने व्यवस्थाको विरुद्ध रहेको ठहर गरिएको छ ।
१५ नेताले महतोको संविधान विरोधी उक्त अभिव्यक्तिबारे केपी ओलीबाट स्पष्ट पारिनुपर्ने माग गरेका छन् ।
पालिका टाइम्स | १८ जेठ २०७७, आइतबार 
