पत्रकारलाई बोलाएर सर्वोच्चले सोधपुछ गर्नु प्रेस स्वतन्त्रता विरोधी काम: महासंघ

Top Post समाचार

११ जेठ, काठमाडौं । समाचारको विषयलाई लिएर इमेज खबर डटकमका सम्पादक राजन कुइँकेल र नेपाल समय डटकमका प्रधान सम्पादक नारायण अमृतलाई सोधपुछका लागि सर्वोच्च अदालतले बोलाएको घटनाप्रति नेपाल पत्रकार महासंघले ध्यानाकर्षण भएको जनाएको छ।

प्रकाशित समाचारको विषयमा चित्त नबुझे या गुनासो रहे त्यसउपर कानुनी उपचार खोज्ने वैधानिक विधि र स्थापित पद्दती हुँदाहुँदै त्यसको बेवास्ता गर्दै सर्वोच्चले पत्रकारलाई बोलाएर सोधपुछ गरिनु प्रेस स्वतन्त्रता विरोधी कार्य रहेको महासंघले जनाएको छ।

संविधानले सुनिश्चित गरेको प्रेसको अधिकारको सम्मान गर्न सम्वन्धित निकायसँग महासंघले आग्रह पनि गरेको छ।

यसअघि प्रधानमन्त्री केपीशर्मा ओली र प्रधानन्यायाधीश चोलेन्द्र शमशेर राणाबीच भेटवार्ता भएको भनी ती सञ्चारमाध्यमले समाचार प्रकाशन गरेका थिए।

लगत्तै शुक्रबार सर्वोच्चले सो भेट नभएको स्पष्ट पारेको थियो भने ती सञ्चारमाध्यमका सम्पादकलाई सोधपुछका लागि बोलाएको थियो।